今次係本會 "FIC旗仔超級訓練中心" 自十月中成立以來第一項活動， 並已於
十二月八日完滿結束。係呢度首先要多謝咁多位有份抽空出席活動朋友！以下
係當日簡短報告，文筆粗糙，請多多包涵。

釣蝦篇

講到釣蝦，幾乎所有參加者（包括小弟在內）都係第一次接觸。起初都有少少手
忙腳亂，不過隔一陣就開始有收獲啦。先拔頭籌係 "無人鬼" ，其後女士們亦
不遑多讓，真係巾幗不讓鬚眉。講到蝦體型都唔細。唔計對鉗最細都有四、
五吋長，大幾乎八吋長都有呀，而且大家釣到蝦都紮紮跳好鬼生猛。因此亦
製造唔少搞笑場面，其間亦有比蝦鉗到，喧嘩聲此起彼落。大家奮力作戰一
輪，結果每人都有收獲，算係有交待，唔使食白果，嘻‧‧跟住就梗係將釣到
蝦就地正法啦。唔使驚，釣蝦場有 BBQ，我地唔會咁冇文化玩生吞，嘿‧‧記
憶中釣到最多蝦應該係 "無人鬼" （?? 又係佢??）。事後我稱他為 "蝦王"
時，無人鬼謙虛回應一句﹕"其實大家都係蝦王！"。冇錯！大都係 "哈" 王！仲
好大聲添！哈‧‧就咁樣我地就係一片歡笑聲中度過兩個多小時，亦完結今
次釣蝦。大踏步向下一個活動進發，去酒樓開餐！

晚飯篇

成棚人去到酒樓，有人問我有冇訂位，梗係有啦！唔係十幾人企係度我咪蝦碌??
分分鐘比人掟落街都似 ^_^" 坐低後亦係主要傾番之前釣蝦趣事，因為其他出
席晚飯朋友仲未到，我地早到少少。之後赴會者亦陸續到來，其間電話個
不停﹕"四哥，你用乜名訂位??" （乜我個名唔係 H4 Salon 咩?）。正當大家
寒喧之際，全晚高潮終於出現！近期人氣急升英雄哥（霍傑）係大家眼前出
現之時，群眾即時異口同聲高呼﹕"英雄哥！！" （附近幾人都望過黎，嘿！）
仲巴閉過香港小姐出場呀。最後終於等齊人，開飯！吃喝之餘，大家閒談話提
亦不離開 "一刻館" ，始終我地都係因為呢一個館主 Kelvin 形容為小小一刻
館之中認識。包括裏面有甚奇人異仕，牛鬼蛇神，當然亦有我地平時係聊天室
傾談片段啦，亦令到場面興高采烈。轉眼大家都食飽飽，散水！亦結束呢次
活動。

檢討篇

今次活動美中不足之處係唔記得請番位攝影師，令大家只可以從文字中分享到
我地當日歡樂，失敗！另外各位有參加今次活動朋友，亦歡迎到會所討論
地帶對今次活動踴躍提出意見，好等將來加以改善，精益求精。多謝！